دراسة جدوى لمزرعة 600 ام و 120 ذكر

[مهندس مصطفى حبيبة]

Rabbits are Successful Enterprise الارانب مشروع ناجح .

مع تزايد عدد السكان فى العالم الى اكثر من ستة مليارات نسمة يتزايد الطلب على الغذاء و خاصة انواع الاغذية الممثلة للبروتين الحيوانى مما يجعل هناك ضرورة مستمرة للبحث عن مصادر جديدة للغذاء او زيادة كفاءة المصادر الموجودة حاليا. هنا ياتى دور الارنب.

مواضيع مشابهة:

• دراسة جدوى لمزرعة ارانب 150 أم
• دراسة جدوى
• دراسة جدوى
• دراسة جدوى
• أريد دراسة جدوى لمزرعة نجيل

[مهندس مصطفى حبيبة]

انا ارنبو الطيب الجميل طبعا كلكم عارفنى انا ارنبو صاحب الجسم الطويل الرشيق( زى الغزالة) ،الفرو الناعم الجميل، اسنانى بيضا جدا و بتلمع. انا صاحب الاذنين الكبيرتين و الطويلة ، العينين الجميلتين. انا ارنبو الذى يعطيكم اللحم الابيض الخفيف و المفيييييييد و السهل فى الهضم. انا ارنبو الذى كام يعيش فى السهول الخضراء و ممكن اعيش فى الصحراء الجرداء و بلد فى الجحور الهادئة و الاماكن المظلمة . انا ارنبو الذى الان يعيش فى البطاريات الخفيفة ويلد فى العلب الصغيرة. انا احب السكون و الهدوء، انا لا احب الاضواء العالية ولا الضوضاء، انا احب البرد ولا احب الحر، انا احب النظافة يعنى نقاء الهواء، و صفاء الماء، ووفرة الغذاء الجيد النظيف، انا مخلوق حسسساس، حساس فى كل شىء، و بخاف جداااااا من كل شىء، و اخاف جدا من العين الحسودة، و من النفس الحقودة، انا من حساسيتى اعرف الاشخاص الذين يدخلوا على فى مزرعتى و اتاثر جداااا اذا كان فيهم حسود او حقود ، انا فعلا حساس و حواسى كلها يقظة جدا، حاسة الشم عندى عالية جدااااا اعلى بكتيرررررر من الكلب البوليسى، بعرف صحابى من ريحة جسمهم ، و اذا كانو شريرين و حساد اشعر فى جسمى نااااار ، و احاول الفرار، و من كتر خوفى على ولادى ممكن اموتهم خوفا عليهم من الحسووووود و من الدمار ، فارجوك ... لا تزعجنى بالزوار. انا عارف طبعا حتقولوا عليا جبان و خواف ، نعم انا خواف و جبان و رعديد كمان. انا بخاف من اقل حركة و من اخفض صوت. اذا سمعت الكلب الذى عندك فى البيت ينبح بصوت عالى يمكن لقلبى ان يصبح فى سكوون دائم . انا حذر و قلوق جدا و ده طبع ولم اشترية، ولذا لا استطيع التخلص منة ، و لكن انا هلوع و قلوق ، علشان انا لا املك اى وسيلة دفاعية و طبعا ولا هجومية ... و كمان محبوس فى بطارية. انا عارف ان الجرى نص الجدعنة، و عارف كمان ان القفز هو النص الاخر ، و علشان كدة انا جدع قوى ، جدع 100%. انا يساعدانى فى القفز طول وقوة ارجلى الخلفية، المهم لن اطيل عليكم، يكفى هذا عن شخصيتى. اعرفك على عائلتى. انا يا سيدى لى خمس زوجات و ممكن اتجوز عشرة... هاهاهاا.. انا جامد اوى... انا قوى التناسل جدا، سريع التكاثر. بحب الجنس جدااااااا ، انا وزوجاتى قسمنا العمل ، انا مسئول الجنس و هية مسئولة عن الحمل و الولادة و الرضاعة و الرعاية... ارجوك طبعا بتقول انا مفترى و ظالم .. انت طبعا عارف ان كل مخلوق ميسر لما خلق لة، لقد خلقن زوجاتى من اجل هذا. همة بيحبوا الامومة جداااااا، بيحبوا ولادهم جدااااا، وللاسف مش بيحبوا ازواجهم ( الذكور). ... دى الحقيقة ، الواحدة فيهم مستعدة تتقبلنى لمدة ثوانى فقط .. و لكن بعد ما انال مرادى منها انقلب على ظهرى او جنبى و اصرخخخخخخ صرخة الانتصاب معلنا لها و لشعب الارانيب نجاح العملية و نجاح التلقيح و معنى كدة انها بعد شهر تقريبا حيبقى عندها 10 ارنبو صغيرين ، و دة كل شهر، يعنى لو عند سعادتك ام واحدة بس و حصلت منها على 10 ارنبو صغيرين كل شهر ، و عطتها فى السنة راحة شهرين ، فممكن تاخد منهافى السنة الواحدة 100 ارنب ، يعنى لو عندك 100 ام ممكن فى السنة تاخد 10 الاف ارنب، يا سيدى على الاقل نقول حتاخد نص العدد دة ؟؟ يعنى ممكن انا بشخصى الضعيف اخليك مليونيييير و احل مشكلة اللحوم فى مصر و الوطن العربى كلة . سلالاتى كتيييييييرة اوى اوى ، و خلى بالك فى ناس بتقول ان فية سلالة جديده اسمها v-line خلى بالك دى سلالة النيوزيلاندى بتاعتى العادية بس جاية من اسبانيا من خط رقم فى فسموة فى لين . السلالة دى حساسة جدااااا للعيش فى مصر لانها مش اخدة على جو مصر و الوطن العربى فارجوك اوعى تجيبها لانها حساسة اوى و مش بتستحمل. و كمان بيقولو عليها انها مش بتصاب بامراض الجرب ولا التسمم الدموى و مش بتتحصن و دة طبعا غلط كبييييير يعنى ازاى بعقلك كدة؟؟؟ يعنى واحد بنى ادم جاى من فرنسا لما يجى مصر مش بيصاب بامراض؟؟؟ على العموم عايز تجيبة انت حر ... انا حزرتك. نرجع لسلالاتى ( المعروفة ) منها الركس، النيوزيلاندى ، الببيون ، الشنشيلا، الكاليفورنيا، و غيرها كتييييييييييير اوى. و علشان تنجح فى مشروعك و تستفيد و تكسب كتييير ... فكلمة السر هى النظافة. انا فعلا نظيف جدا و احب النظافة جدا. انا كل وقتى انظف جسمى و اقدامى. ارجوك .. ارجوك.. مادمت قد حبستنى ان تبعد عنى الروائح الكريهة، خاصة رائحة الامونيا المنبعثة من تخمر الزبل. ارجوك .. ادينى علف مناسب و معمول بطريقة علمية و ان يكون طازج بة كمية من الدريس المجفف بطريقة صناعية . و تعتنى بنظافة الماء الذى اشربة. سيدى و مستثمرى ... سوف تربح الكثيررر من ورائى و سوف اعطيك الكثير من الانتاج، كلما اهتممت سيادتك بان توفر لى انقى الهواء.. وانظف ماء.. و احسن غذاء وكلما وفرت لى مكانا هادئا نظيفا ، و فرشا جافا مريحا ، بطارية علمية مش اى بطارية تنفع. ولا اوصيك بشىء.. غير شىء احد بس ان تعطينى تحصيناتى من ( تسمم دموى بكتيرى و فيروسى و تحصين الجرب ) ، و بعد ذلك لا تخف على فالله خير حافظا ، لا تنسى ان النظافة من الايمان و ربنا امرك بيها ،، عشان تحافظ على اولادى و بناتى. و اخيرا صديقى و مستثمرى تتقبل خالص حبى و تقديرى و تحيات صديقى الوفى ،،،،

م / مصطفى حبيبة
خبير فسيولوجى التناسل و التلقيح الاصطناعى و انتاج و تغذية الارانب

[بليغ حمدى]

بسم الله
سعر العين 85 جنيه يعنى البطارية الهرمى 14 عين تتكلف 1190 جنيه مع ان احسن بطارية لا تتجاوز 900 جنيه والردىء منها يصل الى 600 جنيه اى ان احسن سعر للعين لا تزيد عن 65 جنيه وليس 85 جنيه

وأمهات الارانب سعرها 95 جنيه فى الوقت الذى لا يتجاوز السعر فى السوق ومن افضل المزارع عن 75 جنيه ذكور واناث ووزنها المتوسط 2.5 كيلو عمر 5 شهور

فارق الاسعار بين الدراسة المكتوبة والواقع فى مصر فارق رهيب وهو عيب خطير بالدراسة ارجو اصلاحه

وانصح اى مستثمر يريد عمل هذا المشروع ان يطلب من المشرف ان يشاهد مزرعة عاملة تحقق تلك المعدلات ويرى ذلك على الطبيعة

[مهندس مصطفى حبيبة]

اخى العزيز،،، المهندس بليغ حمدى
اهلا و مرحبا بك
هذه الدراسة دراسة عملية لمشروع 6000 ام ( ستة الاف ام
اما عن البطاريات التى تتلكم عنها ان سعرها غالى يا مهندس بليغ فانها من سلك 4 ملى بالكامل العين 60 فى 55 ..... الصاج محمل و بيت الولادة سلك وصاج
اما عن الارانب التى تقول ان سعرها كبير (غالى)فانها سلالات من كلية زراعة الاسكندرية.... فهل معاهد البحوث بتدى المربى شىء معاااااااب؟؟؟؟
اسال الله لك ولنا الهداية يا استاذ بليغ قبل مهاجمة الناس المتخصصة بالمجال بغير حق؟؟؟

[مهندس مصطفى حبيبة]

اهلا بك مهندس بليغ.... اسال الله لك الخير
-------------------
انا حذفت الدراسة بالكامل لانك كسبتنى و احرجتنى من فتواك المتقنة
على كل حال اليك التالى
البطارية العين 60فى 55 السلك بالكامل 4ملى ...مجلفن ثم الكتروستاتيك
الصاج محمل...بيت الولادة سلك و صاج
اما عن السلالات فهى سلالات استلام كلية زراعة اسكندرية(معهد بحوث ابيس) فهل الكلية بتديك حاجة مش جيدة؟؟؟؟
على كل حال....فكر كويس قبل متهاجم المتخصصين عشان ميهجمكش حد بالاسلوب السىء بتاعك
و اسال الله لك ولى كل خير و ان تاكل من الجنة اشهى لحم طير
اميييييين
اخوك
م/مصطفى حبيبة

[بليغ حمدى]

بسم الله
الموضوع بسيط ومفيش مشاكل انا مختلف معاك فى بعض النقاط ولا اهاجمك
ارجوا ان تتقبل رأيى دون زعل
انا لم اقول ان السلالات فى الدراسة سيئة او مش جيدة والمشاركة السابقة موجودة
انا اعترض على السعر لانه مقارنة بسعر السوق بالفعل مبالغ فيه
الاسعار لو اى حد سأل فى المزارع سوف يتبين انها تدور حول 75 جنيه

اما البطاريات ايضا غالية جدا وسمك السلك لا يكون 4مللى الا فى الواجهة فقط وتختلف الارضية والجوانب ومع ذلك برضة غالية جدا انا اعرف جيدا الاسعار بحكم عملى

الامر الاخير لا يوجد مهندس زراعى دراسته متخصصة بالارانب واعرف هذا لانى خريج زراعة عين شمس قسم انتاج حيوانى شعبة دواجن فلارانب لا تمثل شىء يذكر فى الكورسات المدروسة
والتخصص الدقيق هذا يكون فى الدراسات العليا وعلى اى حال انا اتكلم على اسعار فقط ولم اتطرق بعد للامور الفنية

[هيما]

اختلاف وجهات النظر جميل جدا
وهوة فى حد ذاتة يجعل كل من لدية معلومة يجود بها
وفى ذلك افادة كبيرة للجميع
لذلك
فدعونى احاول اخراجكم من خلافكم ولتجاوبونى على اسئلتى بخصوص تربية الارانب
اولا
اريد ان اعرف اى السلالات افضل تحت الظروف المصرية؟
هل هو النيوزيلندى ام الكاليفورنيا؟
ثانيا مواصفات المكان الذى تربى بة الارانب؟ ايضا مواصفات البوكسات الخاصة بكل من الامهات والنتاج؟
ثالثا المواصفات الواجب مراعاتها عند اختيار الام
وكيف لى ان افحصها للتاكد من سلامتها؟
ايضا هل يمكن تربية النيوزيلندىوالكاليفورنيا مع بعضهما وباستخدام ذكر واحد للتلقيح؟
وانتظروا المزيد لكن بعد الاجابة عن هذة الاسئلة
تحيالتى لكم جميعا

[بليغ حمدى]

بسم الله
- اى السلالات افضل تحت الظروف المصرية
السلالات الموجودة فى مصر غير نقية وبالتالى الفروق بينها غير واضحة والسلالات المنتشرة بمصر هى
النيوزلاندى - الكاليفورنيا - الجانيت فلاندر - الركس

- المكان مواصفاته بسيطة مكان مقفل ومنافذ التهوية مناسبة ممكن غرفة او شقة او مخزن او عنبر دواجن حسب حجم المزرعة
والبطاريات افضل تصميم البطاريات الافقى والهرمى

- عند اختيار الام يراعى المواصفات الصحية من عدم وجود البرد والجرب والعرقوب والهزال والعمر المناسب 5 شهور بمتوسط وزن 2.5 كيلو

- التلقيح بين السلالات المختلفة لا مشكل فيه لانها اصلا غير نقية بسبب تلك التلقيحات

[Mina Garas]

م/ محمد حبيبة
تحية طيبة و بعد

لى تعليق بسيط على جزئية ان الارانب التى مصدرها الكليات ممتازة
حضرتك ذكرت مصدرين كلية زراعة الاسكندرية ثم معهد البحوث الزراعية بالاسكندرية فايهما تقصد
بالنسبة لموضوع سلالات هذه الاماكن انا خريج زراعة القاهرة دفعة 2004 و اخذت تدريب عملى لمدة 3 شهور فى مزرعة القطاع 4 بصفط اللبن كان تحت اشراف الدكتورة ( ) المسئولة عن قسم الارانب بزراعة القاهرة فى هذا الوقت

و الحقيقة غير بما تشهد به حضرتك بالمرة بان " ارانب المعاهد او الكليات ممتازة" لان كانت الارانب هناك لا يجدد دمها و معظمها طويلة الانياب و حضرتك تعلم جيدا انه مرض وراثى ناتج من التربية الداخلية ده غير انه فيما بعد علمنا بالممارسة و معرفة السوق و زملاء المهنة علمنا ان الكلية تشترى ارانب من مزارع بابو النمرس

ارجو و اتمنى من كل قلبى ان تكون كلياتنا و معاهدنا البحثية بل و مزارعنا ايضا بها سلالات ممتازة و معها شهادة تثبت ذلك و تصل لمستوى الجمعية الامريكية لمربى الارانب
قولى معى امين

[جمال عبد العظيم]

شي جميل ان يتناقش اهل الخبرة لكي يستفيد القارئ من هذا النقاش ويعود علية بالمنفعة حيث انني اقتنعت بان الشراء من الجهات البحثية فية عامل الثقة كبير ولكنني وجدت من عمل مع اهل الثقة يشكك في مدي جودة النوعية فلا بد ان نصل بالقارئ الي بر الامان حتي لايفقد الثقة في المناقشة